Fakatokanga ‘oku ‘oatu ‘e he tokotaha nofo totongí

‘E lava ‘e ha tokotaha nofo totongi ‘i ha fale nofo‘anga pooti ke ne fakangata ‘a ‘ene nofo totongí ‘aki ha fakatokanga ‘i ha houa ‘e 48. Neongo ‘oku ‘ikai fiema‘u ia ke fakahoko ‘tohi ‘a e fakatokanga ko‘ení, ko ha fakakaukau lelei ia ki he tokotaha nofo totongí ke fakahoko tohi ia pea tauhi foki hano tatau.

Fakatokanga ‘oku ‘oatu ‘e he lenilootí

‘Oku anga maheni ‘a hono fiema‘u ke ‘oatu ‘e he lenilooti ‘o e fale nofo‘anga pootí ki he tokotaha nofo totongí ha fakatokanga tohi ‘i ha ‘aho ‘e 28. ‘Oku ‘i ai ‘a e ngaahi faka‘atā ki heni.

‘E lava ‘e ha lenilooti ‘o ha fale nofo‘anga pooti ke ne fakangata ‘a e nofo totongí ‘i he taimi pē ko iá kapau ko e tokotaha nofo totongí kuo ne:

• fakatupu, pe fakamanamana ke fakatupu, ha maumau lahi ki he fale nofo‘anga pootí
• fakatupu ha fakatamaki, pe fakamanamana ke fakatupu ha fakatamaki, ki he kakaí pe ‘apí
• fakatupu, pe fakamanamana ke fakatupu, hano hoha‘asi ‘o e kau nofo totongi kehé.

‘E lava ke fakangata ‘e he lenilootí ‘a e nofo totongí ‘aki ha fakatokanga tohi ‘i ha houa ‘e 48 kapau:

• ‘e ‘ikai totongi ‘e he tokotaha nofo totongí ‘a e totongi nofo tōmuí ‘i loto ‘i ha ‘aho ‘e 10 mei hono ma‘u ‘o e tohi fakatokanga ke fakahoko iá
• ‘oku faka‘aonga‘i ‘e he tokotaha nofo totongí ‘a e fale nofo‘anga pootí ki ha taumu‘a ta‘efakalao
• ‘oku tōmui ‘a e totongi nofó pea ‘oku tui ‘a e lenilootí kuo li‘aki ‘e he tokotaha nofo totongí ‘a e lokí (hili hano vakai‘i ‘o e lokí pea, kapau ‘oku lava, fetu‘utaki mo e tokotaha fetu‘utaki ‘a e tokotaha nofo totongí (kapau ‘oku ‘i ai) ‘a ia ‘oku hā ‘i he aleapau nofo totongí).

Kapau ‘e li‘aki ‘e ha tokotaha nofo totongi ‘a e fale nofo‘anga pootí

Kuo pau ki he fakatokangá ke:

• fakahoko ia ‘i ha tohi
• hā ai ‘a e ‘aho na‘e ‘oatu ai ‘a e fakatokangá
• hā ai ‘a e ‘aho ke ngata ai ‘a e nofo totongí
• hā ai ‘a e ‘uhinga ki hono fakangata ‘o e nofo totongí (tukukehe kapau ‘oku ‘oatu ha fakatokanga ‘aho ‘e 28, ‘a ia ‘e ‘ikai leva ke fiema‘u ha ‘uhinga ia ki ai)
• hā ai ‘a e hingoa ‘o e tokotaha nofo totongí
• hā ai ‘a e hingoa, tu‘asila mo e fika telefoni ki he fetu‘utakí ‘a e lenilootí pe ko hono fakafofongá.

Fakatokanga sāuni

‘Oku ta‘efakalao ki he lenilootí ke ne ‘oatu ha fakatokanga sāuni. Ko e ‘fakatokanga sāuní’ ko ha taimi ia ‘e ‘oatu ai ‘e he lenilootí ha fakatokanga ki ha tokotaha nofo totongi ke fakangata ha nofo totongi ke sāuni‘i ‘a e tu‘u ma‘u ‘a e tokotaha nofo totongí ‘i he‘ene ngaahi totonú. Hangē ko ‘ení, kapau ‘e fakahoko ‘e he tokotaha nofo totongí ha lāunga fekau‘aki mo e nofo totongí.

Kapau ‘e ‘oatu ‘e ha lenilooti ha fakatokanga sāuni, ‘e lava ke tohi kole ‘a e tokotaha nofo totongí ki he Tenancy Tribunal ke tuku ‘a e fakatokangá ki he tafa‘akí. Kuo pau ki he tokotaha nofo totongí ke ne tohi kole ‘i loto ‘i he ‘aho ngāue ‘e 28 mei hono ma‘u ‘o e fakatokangá.

Me‘a kuo pau ke fakahoko ‘e he tokotaha nofo totongí ‘i he ngata ‘o ‘ene nofo totongí

‘I he ngata ‘a e nofo totongí, kuo pau ki he tokotaha nofo totongí ke ne:

• mavahe mei he fale nofo‘anga pootí
• ‘ave kotoa ‘ene ngaahi koloa fakataautahá
• mavahe mei hono lokí ‘o tuku lelei ia ‘i ha tu‘unga ma‘a mo maau, pea ‘ave kotoa mo e vevé
• fakafoki ha fa‘ahinga kī, kaati hū‘anga mo e ngaahi nāunau fakamalu‘i kehe ki he lenilootí
• tuku ‘a e me‘a kotoa pē (hangē ko e nāunau fale) na‘e fakaai ‘e he lenilootí ke ngāue‘aki ‘e he tokotaha nofo totongí.

Fakafoki ‘o e totongi pōnité

‘I he taimi ‘e ngata ai ‘a e nofo totongí, ‘oku totonu ke fakahoko fakataha ‘e he tokotaha nofo totongí mo e lenilootí ‘a hono ‘a‘ahi ‘o e ‘apí.

Ko e kau nofo totongi na‘a nau tokanga‘i lelei honau lokí, totongi kakato ‘enau nofó, mo totongi ha ngaahi mo‘ua pa‘anga ‘oku totonu ke fakafoki atu ‘enau pōnite na‘e totongí ‘i ha ngata ‘enau nofo totongí.

Kapau na‘e fakahū ‘a e pōnité ki he Tenancy Services, fakafonu ‘a e foomu ki hono totongi fakafoki iá pea ‘ave ia ki he Tenancy Services ke fakahoko ha ngāue ki ai.

Kapau ko e totongi pōnite ki ha nofo totongi ‘i ha fale nofo‘anga pootí ko ha totongi nofo uike ‘e taha pe si‘isi‘i ai, ‘e ‘ikai fiema‘u ke fakahū ia ki he Tenancy Services pea totonu leva ke totongi fakafoki ia ‘e he lenilootí ‘o fakatatau ki he aleapau nofo totongí.

Fakafoki ‘o e totongi pōnité

Kapau ‘e li‘aki ‘e ha tokotaha nofo totongi ‘a e fale nofo‘anga pootí

Kapau ‘oku ‘i ai ha mo‘ua totongi nofo ‘a ha tokotaha nofo totongi, pea ‘oku tui ‘a e lenilootí kuo nau li‘aki ‘a e fale nofo‘anga pootí, ko e lenilootí:

• te ne lava ‘o tuku ha fakatokanga ‘i he matapā ‘a e tokotaha nofo totongí. ‘Oku fakahā atu ‘i he fakatokanga ko‘ení ki he tokotaha nofo totongí ‘e hū atu ‘a e lenilootí ki he lokí ‘i he houa ‘e 24 ke fakapapau‘i pe kuo li‘aki pe ‘ikai ‘e he tokotaha nofo totongí ‘a ‘ene nofo totongí
• kuo pau ke ne fai hono lelei tahá ke fetu‘utaki ki he tokotaha fetu‘utaki (kapau ‘oku ‘i ai) ‘oku hā ‘i he aleapau nofo totongí.

‘E pau ki he lenilootí ke ‘oua na‘a hū ki he lokí kae‘oua kuo kakato ha taimi ‘e ‘ikai toe si‘isi‘i hifo ‘i he houa ‘e 24 mei hono tuku ‘o e fakatokangá ‘i he matapaá.

Ko ‘ene lava pē hano ‘a‘ahi ‘e he lenilootí ‘a e lokí pea fakakaukau ai, ‘i ha makatu‘unga fakapotopoto, kuo li‘aki ‘a e nofo totongí, kuo pau leva ke nau ‘oatu ki he tokotaha nofo totongí ha toe fakatokanga houa ‘e 48 ke fakangata ‘a e nofo totongí. Kuo pau ke tuku ‘a e fakatokanga ko‘ení ‘i he matapā ‘o e lokí pea fakahā ai ‘a e taimi mo e ‘aho ‘e ngata ai ‘a e nofo totongí.

Ngaahi ‘api pe koloa kuo li‘akí

Kapau ‘e pekia ha tokotaha nofo totongi

‘E ngata ‘a e nofo totongi ‘i ha fale nofo‘anga pooti ‘i ha houa ‘e 48 hili ‘a e pekia ‘a ha tokotaha nofo totongi.